قاعدة whenever

whenever u need somebody u find nobody

whenever u need nobody u find everybody

so, no matter what u will be alone 4ever

أكتب لـ ...

لعلى أكتب لأزيح شعور بداخلى لا أحب احتواؤه

أو أكتب لأتسائل عن معنى فى الوجود لا أفهمه

أو أكتب لأشارك الأخرين ما بداخلى من أحاسيس

أو أكتب لأسجل فكرة لا أريد فقدانها

ولكن عندما تجتمع هذه الأسباب فى لحظة ما

فأقف حائرا لا أدري هل أكتب..

أم أدع اللحظة تمر لحال سبيلها...

Happy Birthday

كل سنة وانا طيب

يوم من عمري

-لما تقعد بالليل تتفرج على أكتر من 30 سيارة اطفاء غير الطائرات وامدادات القوات المسلحة مش عارفين يطفوا حريق بمبنى مجلس الشوري

-وبعدها تحاول تنام بدري عشان تصحي الساعة 6 صباحا عشان تلحق المواصلات قبل ما تزدحم

-وتروح تستنى الموظفين ساعة عشان بعدها تقف ساعة تانية  فى عز الحر عشان يختمولك ورقة وفى الآخر يقولك ورقك ناقص

-تقوم طالع على مكان تانى عشان تخلص ورق تانى وتقف فى طابور ساعة تانى

-ترجع للموظف بورقك كامل تلاقيه قفل الشباك وبيقولك تعالى بكرة

-تركب ميكروباص مشغل "تعبت من المفاجأة ونزلت دمعتى" يديك جرعة كآبة محترمة

وتلاقى كل اللى راكبين معاك بيسبوا ويلعنوا فى الروتين والطوابير

-لازم تروح البيت تقول فعلا "no place like home"

-وتصلى وتقول الحمد لله.

يا أبيض يا أسود

الحيرة القاتلة دايما بتبقى بين أمرين

لأن لو الأمور اللى محتار بينهم كانوا 3 أو أكتر فبسهولة بأقدر أقارن بينهم وأبدأ استبعد الأختيار الأسوأ لغاية ما أوصل للأمرين الأقرب لبعض والمتشابهين لحد كبير

وغالبا الموضوعين دول بيبقى الفرق بينهم هو التأثير على المدى البعيد

زي مثلا لما الأب والأم ييجوا يختاروا نوعية المدرسة اللى ابنهم هيدخلها..

وزي ما طالب الثانوية عامة بيختار ما بين العلمي والأدبي..

وزي مثلا لما الخريج بيختار ما بين وظيفتين أو البنت تختار بين عريسين...الخ

والحيرة دايما بتصاحب الوحدة، لأن الانسان لو ليه ناس قريبة منه كتير هياخد برأيهم وهيستفيد بخبراتهم ومش هيقع فى نفس الحيرة اللى هيقع فيها الانسان الوحيد اللى بياخد قراراته كلها لوحده

كمان الحيرة لازم تبقى ملازمة لاتخاذ القرار

لأنى مش هاحتار غير لما يكون فيه قرار هاتخذه، وبالتالى هامر بمرحلة الاختيار بين البدائل

وهنا هاقع فى الحيرة

وبتختلف الحيرة عن التردد

انا لما اجي اختار بين بديلين ببقى محتار طبيعي لغاية ما ارسي على حاجة فيهم

انما التردد بييجى بعد ما تخلص الحيرة وبعد ما اختار البديل، وبييجى فى شكل اعمل ولا ما اعملش، اروح ولا ماروحش...

اتخذ القرار ولا لأ ؟!

الحمد لله

الحمد لله على نعمه التى لا تعد ولا تحصي

مجرد طائر

كثيرا ما كنت أشاهد من بعيد

أراقب الحركات.. الأشخاص.. الأماكن

أراقب الأشياء

*

واليوم لازلت أقف بعيدا

لا أشارك فى تشكيل الكون

لا أدري ماذا يجب أن افعل

أو من يجب أن أكون

*

هل أكون ذلك الفنان

الذي بشغف تـُـنتـَظر أعماله

أم أصبح عاشقا ولهانا

كما كان قيس فى زمانه

*

أو أصبح ذلك الفيلسوف

التى تـُـحترَم وتـُقدر آراؤه

أم أكون هذا العامل

الكادح غير عابء بشقاؤه

*

أم أني لا أستطيع أن أرقي

لأكون مجرد انسان

غيـ ــ قادر ــ ــر

لا استطيع الكتابة

لايمكننى التعبير

ترى هل فقدت القدرة

أم  أحتاج لتغيير

؟

graduate

  

أخـــــــــيـرا اتخــــرجت

اعلام التهوية

عندما يصبح الشعب بلا هوية.. يكون الاعلام هو فتحة التهوية

يختلف دور الاعلام باختلاف الثقافة السائدة فى المجتمع، فمثلا اذا كانت الثقافة السائدة هي الحرب ومقاومة العدوان، يكون للاعلام دور فى رفع الهمم والعزائم، فى رفع الروح المعنوية، فى زرع التفاؤل والأمل، فى نقل الوقائع لبقية العالم لكسب التعاطف والاحترام والتأييد..

****

أما اذا كانت الثقافة السائدة هي العمل ثم العمل ثم العمل، ياتى الاعلام ليكون هو العطلة غير الرسمية للعمال الكادحين من أجل تقدم مجتمعهم، فيكون له دور ترفيهي بالأساس بجانب الدور التعليمي لمختلف نواحي التقدم التكنولوجي والاقتصادي والاجتماعي.. وأيضا دور تحفيزي عن طريق الاهتمام بالنماذج الناجحة فى المجتمع..

****

فى حالة أن تكون الثقافة السائدة هي الحرية، يأتى الاعلام معبرا عن هذه الثقافة بقوة، حيث يكون الأكثر ازدهارا وابهارا، والاكثر اثارة للجدل، الاكثر تنويعا، حيث نجد المجتمع وقد ترفع عن الاساسيات واصبح يفكر فى الكماليات، نجد افكار فردية فلسفية، نجد جماعات تعلن عن مبادئها الجريئة، نجد اباحية، واقعية، فن ، علم، ترفيه ، نجد الحرية للتعبير للاختلاف للإيمان.. للأختيار..

****

ماذا لو لم تكن هناك ثقافة عامة سائدة فى المجتمع، ماذا لو اختفت ملامح الهوية من اثر شد وجذب الاطراف المتنازعة على السيطرة والهيمنة على ثقافة المجتمع، ماذا لو كان كل فرد يرى ما لا يراه غيره، ماذا لو كان هناك شبه ثقافة تسمي التشتت، ماذا لو اصبحت القوة المسيطرة داخل المجتمع هي الاطراف المتطرفة يمينا ويسارا، ويقع بينهما الفرد حائرا لا حول له ولا قوة، ما دور الاعلام فى ظل القيود والتطرف والتشتت والفقر المادي والفكري..

يصبح الاعلام فى هذه الحالة هو فتحة التهوية التى تخرج لنا الهواء البارد المفلتر الذي يخرجنا من حالة الارهاق لحالة الخمول واللامبالاة.

تاج راسي

أذكر عشرة أشياء عن نفسك

شكرا ل نــازك الملائكة عشان مررتلى التاج دا وأنا هجاوبه غير مضطرا غير آسفا, لأنى حاسس انى بقيت عارف حاجات كتير عن نفسي غير من 6 شهور مثلا كنت حاسس أنى غريب عن نفسي مش عارف عنها أى حاجة, لغاية ماعملت قعدة عرب وقعدنا نتكلم وقلتلها ممكن نتعرف قالتلى نو بروبليم( نفسي ثقافتها الماني:) ) والكلام جاب بعضه ووووو here i'm talkin abt maself  بس متأكد بردو انى هلاقى صعوبة:( 

 

بـــــــــــــســـــــــــــم الــــــــــــــلــــــــــــــــه

1

اسمي محمد عندي 23 سنة مصري مسلم مولود وعايش فى القاهرة

أخترت اسم HeLsiNG لانى لقيته رمز للخير فى اشهر افلام الرعب

2

لسة مخلص امتحانات آخر سنة ليا فى كلية تجارة. هي كليتنا 4 سنين والمفروض انى اكون مخلص من سنتين بس انا عدت سنتين لظروف ما..

3

بحب الناس البسيطة والحياة البسيطة.. كان نفسى اتولد واتربي فى الصعيد.. الناس هناك روحها جميلة أوي والحياة مفيهاش التعقيدات اللى هنا

4

مؤمن بالقضاء والقدر وان حياة الانسان مننا مكتوبة من بدايتها لنهايتها وكل واحد ليه دور بيأديه فى الحياة وليه دور فى حياة الآخرين وان الدنيا ماشية بنظام دقيق جدا رغم الفوضى اللى الانسان بيتسبب فيها

5

قلوق جدا وبفكر كتير ودي مشكلة مسببالى كتير من المشاكل وبحاول الأيام دي اتخلص من العادة (أو المرض) دي.. لأني بجد بقلق جامد جدا على أي حاجة وكل حاجة مش المستقبل بس لأ حتى فى أصغر الصغائر

6

بحب السينما والموسيقى والمسرح والرسم وكل ما له علاقة بالفن.. جه عليا وقت كنت بتفرج على أي فيلم وبسمع أي أغنية.. بس حاليا بعرف اميز الفن الجيد من الفن الردىء.. معتقد فى ان الفن فى حد ذاته رسالة والفن الجيد الصادق هدف فى حد ذاته.. شايف ان السينما اهم وسائل نقل الأفكار والتعبير عن الآراء ووجهات النظر دا بجانب انها وسيلة الترفيه المفضلة ليا

7

فى صفة كل اللى يعرفنى بيقولها عليا بس انا مش شايفها  وهي "الطيبة" فبحاول احجم الطيبة دي لان دا مش وقتها ولا مكانها..

8

بحب الشتا موووت وبكره الصيف موووت.. بحب البرد والمطر والغيوم وبحب اخرج فى الشتا كتير وعكس معظم الناس مش بنام كتير. لكن فى الصيف بحس انى عايز انام الصيف كله او اقضيه على البحر.. بالمناسبة بحب البحر بس هو مش بيحبني (وانا مش بلومه:)  )

9

بحب الصدق ونفسي اوصل للمرحلة "حتى يكتب عند الله صديقا" وبكره الكذب جدا وشايف انه من اكتر العيوب اللى بتؤذى صاحبها وبالتالى المجتمع والدنيا كلها.. وعشان كدة بكره السياسة لأنها تعنى النفاق

10

نفسي اسافر اوروبا وأمريكا وآسيا.. نفسي الف العالم كله واشوف الناس عايشين ازاي وبيفكروا ازاي..

 

المفروض انى اهدي التاج دا ل 5 أشخاص

بس أنا بدعو أى حد مر على المدونة ومش عمل التاج دا يتفضل يعمله

كذاب بأصل وشك

-لاحظت كتير في الايام الاخيرة ان بعض الناس برغم الضعف اللى فى نفوسهم وبرغم الخوف اللى مالى قلوبهم وبرغم الجهل اللى مغيم على عقولهم.. بيظهروا او بيحبوا يظهروا امام الاخرين فى احسن صورة .. صورة العاقل الرزين اللى بيفهم فى كل حاجة.. صورة القوي اللى ما يهزه ريح.. صورة ال funny good looking guy او ممكن نختصر ونقول فى احسن صورة.

-هو في انسان كامل؟ في انسان من غير تناقضات؟ فى حد ممكن يكون فرحان على طول او عاقل على طول او ملتزم على طول...؟

-من فترة قريبة جدا بقول لواحد "انا مخنوق شوية" راح ابتسم بسخرية وقاللى "انا مبعترفش بالحاجات دي" بصيت له باستغراب راح كمل وقال "مفيش حاجة اسمها خنقة واكتئاب..".

-فيه نظريات كتير لعلماء وفلاسفة بتأكد موضوع التعادلية او التوازن او ضرورة وجود التناقضات فى كل شيء وكل شخص. يعنى طالما فيه حب لازم يبقى فيه كره وطالما فى سعادة لازم يبقى فيه حزن ويقاس على كدة جميع المشاعر الانسانية.

-وبناءا على الكلام دا فالانسان اللى مش بيغلط او مش بيحزن او مش بيتشائم دا مش انسان او ممكن نقول عليه انسان مش صريح مع نفسه او انسان كذاب.

-د.مصطفى محمود كان بيقول فى احد كتبه " احيانا تكون مجرد تسريحة الشعر التى نختارها كذبة، طقم الاسنان فى فم الاهتم كذبة، المكياج الذى يحاول صاحبه ان يخفى به التجاعيد هو نوع اخر من الكذب الصامت.. الاعلان الذي يصف لك نكهة السيجارة وفوائدها الصحية يكذب عليك.. وكل ما يدور فى عالم البيع والشراء يبدأ بالكذب.... ".

-افتكرت دلوقتى المقولة الشهيرة "انا لا اكذب ولكنى اتجمل"... اد ايه الجملة دي فى حد ذاتها كذبة كبيرة

-من صور الكذب المنتشر بيننا هو الفتوي فى كل شيء  وخصوصا الدين والسياسة..  بقى عيب انك تقول مش عارف او تقول الله اعلم

-أخيرا.. بحب اوي شعار المسرح "الوجهين المبتسم والحزين" اللى بيعبروا عن الكوميديا والتراجيديا.. بيعبروا عن قمة التناقض .. قمة الصراحة .. قمة الانسانية.

هي إيه ؟

هي ايه من غير امل

من غير حب وعمل

على شوية كفاح

و تعب وعناد وملل

------

هي ايه من غير ما توقعك وتقوم

من غير شمس وقمر ومطر وغيوم

حبة ابيض حبة اسود كتير رمادي

كلها الغاز عمرك ما هتفهمها في يوم

------

ساعة ياخدك الحنين

محدش عارف انت فين

مكتئب مخنوق حزين

وحالتك مطينة بطين

------

تحب تعشق قمر

تقعدوا تحت الشجر

تقولها وتقولك

انت غير كل البشر

------

وساعة تبقى مجنون

نفسك تلف الكون

بعجلة.. عربية.. طيارة

وفى جيبك فرشة ومعجون

------

تصلي وتدعي ربنا

يرزقنا الجنة كلنا

تتأمل فى خلقه وتحمده

دا احنا محدش قدنا

2 سنتيمتر

من يومين شفت راجل بشوفه فى السنة مرة شفت الدكتور بتاعى اللى بكشف عنده عن اى حاجة وكل حاجة راجل متمكن جدا ما شاء الله مجرد ما بسلم عليه بنسي انى عيان اصلا وعلي طول يدينى دواء للى عندى بالظبط مهما كان وحتى لو كان مش تخصصه

المهم انى كنت عيان من حوالي شهر والموضوع زاد الايام دى بسبب ام الامتحانات والتوتر والعصبية والخوف فقررت اعصر على نفسى جريب فروت واروح اكشف

اتصلت حجزت معاد الساعة 10.30 وقعدت حوالى 4 ساعات قلقان وبفكر يا ترى هيقوللى ايه ياترى اللى عندى دا ليه علاج ولا العلاج لاعراضه بس زي البرد يا ترى ممكن يطلع مش عندى حاجة ويقوللى قوم بطل دلع يا ترى ممكن يقوللى انى فاضللى ايام معدودة روح صلي واعبد ربنا لغاية ما يحين اجلك... كنت خير فريسة للقلق حتى جاء الموعد

نزلت رحت للدكتور وكل خطوة كنت بقرب بيها من العيادة كل ما القلق يزيد والتعب يزيد واحس انى خلاص نهايتى على سرير الكشف لغاية ما وصلت

دخلت العيادة وتذكرت (اللى يشوف بلاوي الناس...) ثم ذهبت للممرضة اللى بقالها مع الدكتور اكتر من 15 سنة واللى برغم طيبتها الشديدة الا انها قاسية جدا وبتتعامل مع الناس بتعالى ودا شفته فى كل الممرضات القلائل اللى شفتهم فى حياتى مع ان اللى بشوفه فى الافلام انهم حنينين جدا وحلوين جدا بس الواقع دايما مختلف ولو ربع درجة فهرنهايت عن الافلام..

طول عمري بكره الانتظار وخصوصا فى الاماكن المغلقة اللى فيها ناس مرصوصة جنبى كلهم فى انتظار دورهم قعدت مضطر جنبهم استنى دورى (مع انى حاجز ورايح فى ميعادي)

وانا قاعد سرحت بفكري ورجعت ل 6 سنين فاتت كنت تعبان جدا بردة بس ما رحتش للدكتور هو اللى جالى البيت لانى مكنتش قادر اقوم من على السرير ..

كنت ساعتها فى تالتة ثانوى فى اوقات الامتحانات بردة وكله بسبب ام المذاكرة ضغطت على نفسي جامد ساعتها لغاية ما جبت جاز ورقدت ما قدرتش اقوم وجالي دكتور شاب "هو اللى لاقوه ساعتها" بصلى بشفقة وابتسم وسألنى "فى ثانوية عامة ؟" ...وكأن زباينه فى الوقت دا كان كلهم ثانوية عامة المهم قاللى عندك انيميا وكتبلى على فيتامين ومشي ..

"رقم 16" تنادي الممرضة "الطيبة" فاقوم اشكى للدكتور يمكن يقوللى ابعد عن البيبسي والشاي والقهوة والمذاكرة..

دخلت سلمت عليه وسألنى على اسمى واذا كنت مدخن وكتب "سموكر" على الروشتة انا قلت بس يبقى العلاج انى ابطل تدخين ..

حكيت له اللى عندى وكشف عليا بالمنظار ..قعد رايح جاي بالمنظار لغاية ما وقف وقاللى عندك حصوة بصيتله مستنيه يكمل راح قاللى حصوة اهى 2 سم انا سمعت 2 سنتى دى وقلبى وقع في رجليا 2 سنتى دي قد عقلة صباعي الخنصر -او السبابة مش هتفرق- .. بعديها قاسلى الضغط وقال كلام مفهمتش منه حرف لانى كنت مذهول مع انى كنت متوقع اسوأ من كدة بس الواقع شىء تانى غير التوقع

كتبلي على دوا مؤقتا لغاية ما يشوف التحاليل اللى طلبها ضروري تانى يوم..

رحت تانى يوم بعد احلام وكوابيس لخصت كل السيناريوهات المتوقعة لمقابلة الدكتور اخدت نتيجة التحليل ورحت دخلت للدكتور بص بسرعة فى الورقة وقاللى "لا تمام تمام زي ما قلتلك 5 كبايات ميه و5 سوايل .. واستمر على الدوا لغاية ما تجيلى يوم الاتنين"

اتخنقت جدا –بس من جوايا ارتحت- فقلتله يعنى يا دكتور الدوا والميه وان شاء الله هاخف قاللى ايوة ان شاء الله متقلقش.. يعنى ممنعش اى حاجة يا دكتور-بلمح على السجاير- "لا لا هي الفراولة والمنجا بس بلاش منهم"

خرجت مش عارف احس بايه احس بالالم اللى فيا ولا الحيرة والقلق من مدى فاعلية العلاج دا ولا افكر ان الالم دا كله تكفير عن ذنوبي واقول الحمد لله ولا افكر فى المذاكرة اللى ورايا وانا سايبها عشان بتلكك اساسا ولا الاحباط اللى حوالينا بسبب الاسعار والبطالة والجهل اللى بلدنا غطسانة فيه ومش ناوية تقب ...

آهات

آه من قلب لم يذق الحب

آه من نفس لم تؤمن

آه من عاص لم يتب

آه من لسان لم يصدق

آه من سفينة لم ترسو

آه من شمس لم تشرق

آه من دين لم يسدد

آه من عين لم تدمع

آه من صلاه لم تؤدى

آه من عقل لم يفكر

أه من فكرة لم تكتمل

آه من كتاب لم يقرأ

آه من حاكم لم يعدل

آه من طير لم يحلق

آه من شعب لم يثور

آه من جندي لم يحارب

آه من علم لم يدرس

آه من نبي لم يتبع

آه من قادر لم يعفو

أه من حلم لم يحقق

كلاسيك

سمعت من فترة ان الموسيقى الكلاسيك بتساعد على التركيز بدرجة كبيرة فكنت وانا بعمل حاجة افتح اذاعة البرنامج الموسيقى واسمع تشايكوفسكي وموتزار وباخ ...

امبارح وانا ببدأ مذاكرة كالمعتاد قبل الامتحانات بشهر افتكرت الموضوع دا فدورت علي النت على موسيقى كلاسيك فلقيت مقطوعة لرخمانينوف فضلت مشغلها وقاعد بذاكر اتعادت اكتر من 20 مرة وانا مش حاسس باى حاجة غير المذاكرة اللى قدامى

بجد احسن طريقة للمذاكرة مكان هادى جدا وتشغل موسيقى كلاسيك ويستحسن تكون بدون "كمان وتشيللو ..." عشان مش تاخدك للسرحان واحلام اليقظة اللى بتيجى اوقات المذاكرة.

sergei rachmaninoff - prelude in c# minor.mp3

Download it at mp3space.com

أنا

تحديث : القصيدة دي بقلم الشاعرة العراقية نازك الملائكة

الليل يسأل من أنا

أنا سره القلق العميق الأسود

أنا صمته المتمرد

قنعت كنهي بالسكون

ولفقت قلبي بالظنون

وبقيت ساهمة هنا

أرنو وتسألنى القرون

أنا من أكون؟

-*----*-

والريح تسأل من أنا

أنا روحها الحيران أنكرنى الزمان

أنا مثلها فى لا مكان

نبقى نسير ولا انتهاء

نبقى نمر ولا بقاء

فإذا بلغنا المنحنى

خلناه خاتمة الشقاء فإذا فضاء!

-*----*-

والدهر يسأل من أنا

أنا مثله جبارة أطوي عصور

وأعود أمنحها النشور

أنا أخلق الماضى البعيد

من فتنة الأمل الرغيد

وأعود أدفنه أنا

لأصوغ لي أمسا جديد

غده جليد!

-*----*-

والذات تسأل من أنا

أنا مثلها حيرى أحدق فى ظلام

لا شىء يمنحنى السلام

أبقى أسائل والجواب

سيظل يحجبه سراب

وأظل أحسبه دنا

فإذا وصلت إليه ذاب

وخبا وغاب

نازك الملائكة

Dark Dream

انقطع النور.. لم أجد شيئا لفعله

القيت بجسدى على الفراش..

بدأت الرحلة

دخلت فى صراع مع الامواج..

مع الظلام..

مع كل ما أخاف ومن أخاف

قابلت اشخاصا لا أريد أن أراهم

سمعت أصواتا لا أحب سماعها

سقطت من اعلى مكان لاجد نفسي في اللامكان

رأيت الأمل يتلاشى في ظلمة القلوب..

رأيت روحي وقد طافت فى الدروب

رأيت حينا ولم ارى احيانا..

فى ظلمة الخوف سافرت أزمانا

حاولت وحاولت أن افتح عيناي

اصرخ.. لقد سأمت هذه الرحلة

فتحت عيناي لأصطدم بظلام الواقع

ولأجد ما مر من أزمان ما هو إلا دقائق معدودة

Heart vs. Mind

عقل:انا تعبان اوي من كتر الشغل انت رامي عليا كل الحمل وقاعد مستريح

قلب: قاعد مستريح ايه هو انا ينفع اقف لحظة ما انا شغال اهو

عقل: مش قصدى انك تنبض، انا قصدى انك تتصرف شوية فى المواقف اللى صاحبنا بيقع فيها مش كل موقف يقوم ركنك انت على جنب وانا اللى افكر واتعب ومعرفش فى الاخر اذا كان التصرف صح ولا غلط

قلب: لا مش صح طبعا انت كل حاجة واخدها بالمنطق والعلم والمبادىء والاصول

عقل: ما هو دا الصح امال عايزنى امشى ورا تخاريف ومعتقدات واوهام ملهاش قاعدة علمية واضحة

قلب: انت بتسمى الايمان والحدس والاحاسيس والمشاعر اوهام وتخاريف

عقل: ايوة لأنها غير قابلة للتصديق الا لو كان ليها قاعدة علمية منطقية

قلب: لأ الكلام دا صح فى بعض الاحيان لكن مش فى كله يعنى متشوفش بنت عجبتك وتقعد تفكر اسبوع اروح اكلمها ولا لأ

عقل: لا لا انا فكرت بالمنطق مش ممكن البنت تصد صاحبنا مش ممكن تكون مرتبطة مش ممكن اى حاجة تحصل..

قلب: طيب وفيها ايه اهو ابقى حاولت واستفدت تجربة جديدة

عقل: نفسى فى مرة تتفق معايا على حاجة عشان منتعبش ونتعب صاحبنا معانا

قلب: عمرنا ما هنتفق طول ما انت فاكر انك الاحسن

عقل: طيب ما انا الأحسن فعلا

قلب: احسن فى ايه بقى دا انت على طول بتفكر وتاعب صاحبنا من التفكير فى كل حاجة مفيش ولا حاجة بيعملها بتلقائية من غير ما تنطله انت فيها

عقل: يعنى عايزنى اشوفه بيغلط واسكت دى مش طبيعتى وانت عارف كدة

قلب: يعنى هي طبيعتى انا ..انا بس بديله الفرصة بديله دفعة وجرأة ونشاط وحماس وخوف وحزن وغضب لو لزم الأمر

عقل: ما تنساش بردة ان المشاعر بتاعتك دى لو زادت عن حدها بتتقلب ضدها وانا اللى بخلي صاحبنا يتحكم فى مشاعره دي عشان ميتأذيش

قلب: بس انت مش بتخليه يتحكم فيها انت بتخليه يلغيها خالص وخليته بقى انسان جامد مش بيحس

عقل: لأ انت غلطان انت اللى بتخليه انسان منجرف ورا مشاعره واحاسيسه وبتخليه انسان ضعيف

قلب: لأ .....

ومازال الحوار مستمر وصاحبنا مش عارف يمشى ورا مين..

فكرة

جت فى دماغى فكرة

قلت أخليها لبكرة

ألحت عليا وقالت

شكلى هابقى زكرى

=_=_=_=

قلتلها لأ خلاص

ومسكت القلم والكراس

وقلت أكتبها حالا

يمكن فيها الخلاص

=_=_=_=

أدور فى دماغى

ألاقيه حر وفاضى

راحت فين الفكرة

ماتت مع أجدادي

=_=_=_=

ساعتها أخدت قرار

مفيش فكرة ولا حوار

هيعدوا كدة بالساهل

دى الفكرة أول المشوار

بحاول

بحاول ابقى سعيد بحاول

بحاول ابتسم واتفائل

*****

تمثيل فى تمثيل

كله بيعدى ويشيل

*****

كفاية يا قلبى عياط وبكا

كفاية خوف من برد الشتا

*****

الدنيا اربع فصول على كل الناس

كلهم شتا فى قلبى من قسوة الاحساس

*****

عمرك فى يوم كنت متشائم

والناس حواليك بتتلائم

*****

مش عارف تاخد حق ولا باطل

بصراحتك ورأيك العادل

*****

وقلت لازم أتغير

هاسرق واقتل وابرر

*****

لازم يا نفسي تلفى وتدورى

وتعتزى بكدبى وغرورى

*****

ما هي دنيا بنت ستين فى سبعين

عقلى فى القفص سجين

وقلبى الطيب حزين

امتى هاتيجى يا يوم الدين

*****

امتى هاتيجى يا يوم الدين

باعترف

بيقولوا الاعتراف سيد الادلة .. وعشان كدة انا قررت انى اعترف

اعترف بايه ؟ .. بانى مدمن .. ايوة مدمن ومش عارف ابطل

بحس بالسعادة وانا باتعاطى

بحس بالنشوة .. بحس بانى فوق .. فوق اوى

ببقى عايز اصرخ واقول .. انا جدع

انا مفيش زيى فى الدنيا

=====================

الكيف دا حاجة جامدة جدا .. حاجة فوق الوصف

حاجة لما ببعد عنها بحس انى وحيد

بحس انى مشتاق ليه اوى .. باحس بالحنين

بحس ان ممكن يجرالى حاجة لو مخدتش الجرعة

ببقى عايز اصرخ واقول .. انا مدمن

=====================

بس اول ما افوق .. بحس بالندم

ببص فى المراية واقول اخص

انا يطلع مني كل دا

لا لا مش انا اللى اعمل كدة

واصرخ واقول .. انا لازم اتعالج

=====================

اكتشفت قريب ان في ناس زيى كتير

وانهم بيحاولوا يتعالجوا .. وكتير منهم نجحوا

وعرفت ان اول خطوة للعلاج هى الاعتراف

عشان كدة انا باعترف دلوقتى

وباصرخ واقول ..انا مدمن انترنت

أول تاج

وأنا باتجول ما بين الكلمات والمدونات والافكار والاراء لقيت حاجة اسمها ال"تاج"

عبارة عن أسئلة بيتداولها المدونون وبيجاوبوا عليها من وجهة نظرهم

التاج دا دعتنى ليه "Yuki" :

:
:
:


- لو سألك غير المسلم عن نبي الإسلام بماذا ستجيبه في سطور؟
هو خاتم الأنبياء ، هو الصادق الأمين، بٌعث فى الخلق أجمعين
يتبع سنته أكثر من مليار مسلم، نزل عليه الوحي بكتاب من عند الله لا يضاهيه كتاب ،
هو المعلم لكل من أراد ان يتعلم كيف يفوز بدنياه وأخراه...

~~~~

- لو أتيحيت الفرصه لرؤية النبي صلى الله عليه وسلم في أي مكان تريد أن تقابله؟
أصلي وراءه فى مسجده بالمدينة المنورة

~~~~

- مالذي ستخبره به؟
هاقف عاجز عن الكلام

~~~~

- وماذا ستطلب منه ؟
أن يشفع لى

~~~~

- أذكر مقوله قالها النبي صلى الله عليه وسلم لصحابي تمنيت لو كان قالها لك ؟
بكى الرسول-صلى الله عليه وسلم-فقالوا: "ما يبكيك يا رسول الله" قال:" اشتقت لأخواني" قالوا: "اولسنا اخوانك يا رسول الله " قال: "لا انتم اصحابي اما اخواني فقوم يأتون من بعدي يؤمنون بي ولا يروني".

~~~~

- أذكر أحب حديث لرسول الله صلى الله عليه وسلم لقلبك ؟
{ لا يؤمن أحدكم حتى يحب لأخيه ما يحب لنفسه}

~~~~

- كيف تعرفت على سيرة الرسول صلى الله عليه وسلم ؟ ما هو المصدر ؟
من المكتبة المدرسية، بعد كدة بدأت اشترى كتب

~~~~

- أذكر صفه تدل على عظيم خلقه صلى الله عليه وسلم والاستدلال عليها بموقف ما ؟
:.الصادق.:
صعد رسول الله صلى الله عليه وسلم ذات يوم الصفا فقال‏:‏ يا صباحاه فاجتمعت إليه قريش فقالوا له‏:‏ ما لك قال‏:‏ أرأيتم لو أخبرتكم أن العدو مصبحكم أو ممسيكم أما كنتم تصدقون قالوا‏:‏ بلى...

~~~~

- هل هناك تأثير لرسول الله صلى الله عليه وسلم على شخصيتك أو حياتك او بيتك إذا كانت الإجابه نعم فأذكر مثالا واحدا لكل منهم ؟
نعم هناك تأثير ، بحاول اكتسب الصفات الحميدة اللى كان بيتصف بيها نبينا صلى الله عليه وسلم زى الصدق والأمانة والايجابية والتصدق والصيام والرحمة وبحاول انى اتعامل مع الناس بالحديث الجميل دا ( لا يؤمن أحدكم حتى يحب لأخيه ما يحب لنفسه) صدق رسول الله صلى الله عليه وسلم.

نبدأ بخطوة

دايما بنتكلم .. ونقول ونعيد

مفيش فايدة ومفيش جديد
----
الحال هو هو .. ويمكن زاد شوية

وكله بسبب الفول والطعمية
----
مش هاعيب على حد .. لا حكومة ولا معارضين

انا شايف العيب .. عيب بنى آدمين
----
شباب بيضيع .. بيشرب حشيش

وناس بتفكر تغير لون النيش
----
بنات فى الكباريهات .. محدش شايل همهم

اطفال فى الشوارع .. الكلب أنضف منهم
----
فجوة طبقية بين الغنى والفقير

انا اشرب من القلة وانت من الكولدير
----
الأمل موجود جوانا كلنا

بس احنا نسمو فوق همنا
----
خلينا ايد واحدة .. نعمل المستحيل

نبدأ بخطوة .. هنعدى الألف ميل

عندهم دم ؟

انهاردة كان يوم عادى جدا فى حياتى

صحيت الساعة 4 اتوضيت وصليت الفجر

وفطرت كالمعتاد جبنة وقشطة ومربى وكباية عصير فريش

شوية والاخبار اتبعتتلى على الموبايل قريتها بسرعة

اتمرنت شوية فى الجيم اللى فى جنينة الفيلا، خدت شاور

وسلمت على اسرتى ونزلت ركبت العربية ورحت الشغل


الشوارع كانت رايقة جدا، وصلت الشغل بسرعة

لقيت الروبوتس مجهزين كل حاجة وناقص على امضتى

مضيت اللى هما عايزينه ونزلت


روحت لقيت اسرتى منتظرين عشان نخرج نتغدى سوا

صلينا الضهر وروحنا اتغدينا والاولاد لعبوا فى البلاي جراوند

وانا قعدت أقرا شوية فى كتاب "هل تؤمن بوجودهم؟"


روحت صليت العصر و خرجت اقابل اصحابى قعدنا نتكلم شوية

بعد المغرب روحت امارس هوايتى المفضلة وهي التليسكوب :

قعدت قدام الشاشات الكبيرة اللى عندى وبالريموت كنترول

احرك التليسكوب يمين وشمال عشان اشوف الفضاء والاجسام الغريبة اللى ربنا خلقها

لغاية ما لقيت اللى بدور عليه واللى بحب اتابعه باستمرار


ثبت الصورة وكالعادة سرحت فيها وقعدت أتأمل وأقول سبحان الله ..

قد ايه جميل الكوكب الأزرق دا ..

يا ترى فيه كائنات عايشين فيه زينا؟

يا ترى شكلهم ايه؟ ..

عايشين ازاى؟ ..

عندهم عقل؟ ..

عندهم قلب؟ ..

عندهم دم؟
:
:

أحلم معايا

Hamza Namira

:

:
/\

أحلم معايا .. ببكرة جاي
ولو ما جاش أحنا نجيبه بنفسنا

نبدأ نحاول .. فى الطريق
كتر الخطاوى تدلنا على حلمنا

مهما نقع .. نقدر نقوم..
نشق... نتحدى الهموم
نلاقى ليلنا ألف يوم .. بس أحنا نحلم

أحلم معايا يا صديق
تطوى الخطى ارض الطريق
يهمنى حلمى البرىء مهما يكون

يفضل بروحه جنبنا
مهما يطول منا الطريق
لو حتى توهنا يا صديق
يرجع لقانا يضمنا
على حلمنا .. على حلمنا

بس أحنا نحلم

الشهادة الكبيرة

خلاص كلها 3 شهور وتنتهى الرحلة رحلة متوسط مدتها 18 سنة
تبدأها وانت 4 سنين وتنهيها عندك 22 سنة
رحلة اتفرضت علينا زى ما اتفرضت على اللى قبلنا وهتتفرض على اللى بعدنا

رحلة ليها مراحل كلها اصعب من بعضها
وكلها احلى من بعضها سواء مرحلة ابتدائية، اعدادية ، ثانوية، أو جامعية
رحلة بتخلص بحتة ورقة اسمها "البكالريوس"
أو "الشهادة الكبيرة" زى ما كانوا بيقولولى زمان
مش عارف كبيرة فى ايه حجمها ولا قيمتها..
ولا المجهود اللى اتبذل فيها .. ولا الفلوس اللى اتصرفت عشانها
-----------

مش عارف افرح انى فى آخر ترم من الدراسة
وخلاص مش هابقى طالب تانى ومفيش مذاكرة
وهاعمل اللى انا عايزه فى حياتى


ولا ازعل على الايام الحلوة اللى مش هتعود تانى
هى صحيح مش حلوة اوى يعنى
خصوصا سنوات الجامعة
الناس كلها كانت بتقولى ايام الجامعة احلى ايام حياتك
عيشها بالطول والعرض والارتفاع

عيشتها فعلا بس بالرفع
كانت اسوأ فترة فى حياتى فترة الجامعة شفت فيها الفشل لأول مرة شفت الضياع
شفت فقدان الامل
شفت الناس رافعة شعار"مصلحتى اولا"
شفت كتير .. كتير وقليل (على رأي الست)

وبرغم كل اللى شفته برده انا لسة جوة الكتاب
لسة مخرجتش برة الكتب والكشاكيل وسلاح التلميذ
لسة معشتش الحياة بكل ما فيها من حاجات وحشة
وحاجات تانى وحشة
وحاجات مختلفة خالص فى انها بردة وحشة
وشوية حاجات حلوة

أول كلمة

ياااااااااه أخيرا بقى عندى مدونة
بقالى كتير باسمع عن الblog أوالمدونة
بس ما جتش الفرصة انى ادخل فى العالم دا


اخيرا جت الفرصة بعد 4 شهور متواصلة من الDSL
ومن المشاركة فى منتدى "كل الطلبة" اللى حبيته جدا
وبعد ما لقيت ناس كتير جدا عاملين مدونات
قررت انى اعمل المدونة دى عشان احط فيها افكارى وكلماتى وارائى


دورت كتير على أسامى لمدونتى ملقتش احسن من "الكلمة"
بعد ما سمعت الاغنية دى لمحمد منير


الأغنية بتقول:

الكلمة إيد .. الكلمة رجل .. الكلمة باب
الكلمة .. نجمة كهربية فى الضباب

الكلمة كوبرى صلب .. فوق بحر العباب
الجن يا أحباب ما يقدر يهدمو
فاتكلموا
اتكلموا
:
اتكلموا
اتكلموا