سعادة انتقالية !

من اصعب القرارات اللي ممكن حد يتخذها
القرارات المعروف نهايتها ايه وامتى
وخصوصا لو القرار مترتب عليه سعادة لحظية او مؤقتة -معروف انها هتستمر لفترة وتنتهي-

ناس بتقول ليه اعيش السعادة دي وانا عارف انها هتنتهي قريب
وهزعل جدا على خسارتها وهاخد فترة كبير عشان انسى لحظات السعادة دي
ما انا ممكن اتعب شوية واضغط على نفسي واتجنب السعادة دي من الاول واتجنب الزعل الكبير اللي هيحصل بعد فقدانها

وناس بتقول انا لازم طبعا اتخذ القرار اللي هيحققلي السعادة
بغض النظر عن وقتها القليل وبغض النظر عن خسارتها والجرح اللي هتسيبه
وممكن والله اعلم تستمر السعادة دي لفترة اطول شوية ويمكن الجرح ميبقاش بالقوة اللي تخليني اندم على اتخاذ قراري

Another Tag

البوست دا عبارة عن اجابات تاج بعتهولي "عمك ياض" من مدونته شخابيط :

اسمك ؟
محمد
المشهور بيه وسط اصحابك؟
helsing
سنك ؟
23 ونص
مجال دراستك ؟
خريج كلية تجارة محاسبة
اسم مدونتك ؟
الكلمة
صورتك الرمزية في المدونة بتعبر عن إيه ؟؟
لو اتكلمت عنها هتفقد معناها خليها كدة كل حد يبصله يفهمه بطريقته
هل فكرت في اغلاق المدونة والسبب ؟
اه فكرت مرة اني اقفلها عشان حسيت اني مش عارف اعبر فيها عن نفسي ودا الغرض الاساسي ليها
ايه رد فعلك لو حد قل ادبه في تعليق ؟
مش فاكر انها حصلت وماعتقدش انها ممكن تحصل بس على حسب الموقف وقلة الادب هتصرف
اسوأ مدونة ؟
مش فاكر اني زرت مدونة سيئة اوي بس اي مدونة بدون هدف محدد وواضح سيئة جداااااا وكمان المدونات اللي الهدف منها المعارضة من اجل المعارضة
هيحصل ايه للايميل بعد ما تموت ؟
السؤال دا عجبني جدا D: بس اجابته ممكن تتغير من فترة لفترة.. عل العموم اجابته دلوقتي ان الايميل هيتوقف
اديت الباسوورد لحد قبل كده ؟
لأ
السفر بالنسبة لك ؟
هروب من الواقع او فترة راحة واستجمام
الموووود بتاعك ايه ؟؟
دلوقتي مبسوط الحمد لله
بتعمل ايه في وقت فراغك؟
بقعد على النت او بخرج مع صحابي او اتفرج على فيلم
الأكلة المفضلة ؟؟
الفراخ باي طريقة والبيتزا وحاجات كتير...
الصفات التي أخذتها من والدي ؟
الصبر وعدم الثقة بسهولة والطيبة....
الصفات التي أخذتها من والدتي ؟
الاستماع ومساعدة الاخرين....
اكتر ست حاجات بتكرههم ؟
الكذب - التحكم - الزحمة - التمثيل - العجز - الظلم
اكتر ست حاجات بحبها؟
الهوا - الحرية - الفن - الصداقة - الكتابة - الحب
شخصيتك نوعها إيه؟
هتفهم من اجاباتي على التاج نوع شخصيتي
لماذا دخلت عالم التدوين من الاساس ؟
عشان اعبر عن نفسي بالطريقة اللي بحبها (أكتب ل..)
أحلي جملة قيلت في وصف مدونتك ؟
مش فاكر بس فيه تعليقات على بوستات معينة حلوة ومشجعة جداااا
اهمية التعليقات بالنسبة لك ؟
الاهم من التعليقات ان حد يقرا البوست، بس طبعا فيه تعليقات مهمة وبتسعدني جدا زي لما حد يسأل على غيابي عن المدونة او حد يقوللي اني موهوب وبكتب كويس فاتشجع واستمر..
احلى بوست كتبته ...ضع اللينك , ثم اذكر لماذا؟
بحب حاجات كتير بس ههحط لينك مجرد طائر
ليه.. عشان من اكتر التدوينات اللي بتعبر عني بعمق
أفضل مدونة قراتها ؟
فيه مدونات كتير ممتازة مممم ممكن "Demaghy" لمحمد حمدي
أفضل بوست قراته ؟
مش فاكر
الشغل بالنسبة لي ؟
وسيلة لكسب الرزق
الانترنت بالنسبة لك ؟
افضل اختراع بشري
تمرر التاج ده لمين ؟
اتمنى كل اللي يقراه ياخده في مدونته ويجاوبه

عيد ميلاد الكلمة

Birthday Party

انهاردة 27 مارس 2009 يبقى عدت سنة بالظبط على اول كلمة

كل الطلبة
-كنت دخلت عالم المدونات بنصيحة من اعضاء كل الطلبة بعد ما حطيت موضوع باول خاطرة كتبتها
-اول حد علق على مدونتي من منتدى كل الطلبة ولغاية دلوقتي معظم او كل اللي بيعلقوا على الكلمة من المنتدى
-وسيلة نشر مدونتي الاولى كانت من خلال توقيعي في المنتدى
-معظم المدونات اللي كنت متابعها عرفت بعد متابعتي ليها لفترة ان اصحابها اعضاء في كل الطلبة

عالم المدونات
-شفت في خلال السنة دي مدونات كتير بس لاحظت ان معظم المدونات المصرية يا اما غرضها سياسي معارض للحكومة او غرضها شخصي زي (الكلمة) كدة وفيه بعض المدونات اللي غرضها تقني واللي غرضها ادبي او فني او دعوي او تبشيري او خدمي او تجاري...
وفيه ناس تانية عاملين مدونات لمجرد انها موضة او فراغ او تقليد او او....

-لاحظت ان فيه ناس كتير بتعمل اكتر من مدونة لاسباب كتير منها اللي بيعمل مدونة خاصة بيه ومدونة شرك مع حد من صحابه
ومنها اللي بيعمل مدونة لغرض كتابة مقالات مثلا ومدونة زي يوميات ومنها اللي بيعمل مدونة شخصية ومدونة تقنية ومنها اللي بيعمل مدونات كتير دعوية ومنها اللي بيعمل مدونة مفتوحة للزوار ومدونة مغلقة ليه لوحده زيي كدة وبالمناسبة مدونتي الاخرى مكتبتش فيها حاجة حتى الان....

-فيه 3 مواقع مستحوذين على العدد الاكبر من المدونين العرب وهما Blogger , wordpress , Maktoob
عملت مدونة على WP وكنت في طريقي لانشاء مدونة على مكتوب بس مستريحتش غير هنا في كلمتي على بلوجسبوتي من جوجلي..

انا والكلمة
-كل البوستات كانت text يعني مش فاكر اني حطيت صورة او تصميم بس
-كان غالب على البوستات انها شخصية جدا
-طبعا كل البوستات مختصرة جدا جدا لاني مش بحب الرغي بطبيعتي سواء كلام او كتابة -يمكن دا اكبر بوست اكتبه هنا-
-كتبت رباعيات من غير ما اعرف يعني ايه رباعيات، صحيح هي مش موزونة ولا ليها اي قاعدة بس نقدر نسميها رباعيات
-كانت كل الكتابات عربي الا مؤخرا كان فيه حاجات مش بعرف اعبر عنها كويس غير بالانجليزي
-غيرت ثيم المدونة تقريبا 4 مرات ومش مستريح خالص مع ولا ثيم مع ان الاخير لعبت في الcoding بتاعه عشان يبقى مميز محدش عامله خالص
-دايما بحط gadgets بسيطة على سايد بار المدونة لاني مش حاببها تحمل وقت كتير ومش بحب الزحمة
-اكتر بوست حبيته هو فكرة
-عملت تقريبا 3 تاج تقضية واجب لأني اصلا مش مستسيغ (مش عارف صح كدة الكلمة دي!) فكرته
-التعليقات كانت مهمة جدا بالنسبالي في البداية بعد كدة مبقتش تفرق اوي حد علق او لأ المهم اني اكتب اللي على بالي وخلاص

اخيرا
"كل سنة وانتي كلمتي"

To Do

ورايا مشاوير كتير اوي
كتبتهم في ورقة على شكل To-Do List عشان منساش حاجة طلعو 9 مشاوير
من ال 9 مرحتش غير واحد بس
ومكسل اروح الباقي عشان كلهم الصبح وكلهم في مصالح حكومية :s

when i think of you

when i think of you
i think of greatness

it was sweet sitting beside you
listening and feeling your tenderness

i loved every action did you
even if it had harshness

as long as it was from you
it just gave me happiness

انا بتغير !

مين الل يتغير ؟!

اللي عنده ارادة وسبب يخليه يتغير

اتغير ليه ؟!

لازم يكون فيه سبب مهم جدا عشان اتغير
يعني مثلا بعمل حاجة وحشة جدا فهاتغير عشان الحاجة دي سيئة وليها اضرار
سواء الحاجة دي ملموسة (بشرب مخدرات...) او غير ملموسة (بحقد على الناس...)

اتغير ازاي ؟!

اتغير اني اغير عادة او اغير طريقة تفكير

اتغير امتى ؟!

لما احس ان الحاجة اللي محتاجة تغيير دي بتدمرني او هتوقفني او هتوديني النار..

اتغير فين ؟!

في مكاني، يعني مطلبش ان كل حاجة حواليا تتغير او اني اسافر مثلا عشان اعرف اتغير

هتعمل ايه ؟!

هتعمل ايه لو نمت يوم وصحيت ...بصيت

وشوفت نفسك فى المرايا بكيت

جواك سؤال تصرخ تقول انا مين ... انا مين

انا زى ما انا ولا اتقسمت اتنين

وبعدين قول ياللى فى المرايا

فهمنى ايه الحكاية فرحان ... تعبان ... مرتاح

لما حاجات كتير ف حياتنا اتسببت فى حيرتنا

وادينا عايشين راضيين ... جايين ورايحين

هتعمل ايه لو نمت يوم وصحيت ... ولاقيت

اقرب ماليك فى الدنيا مش حواليك

هوه انت مين اللى عمل كدا فيك ... كدا فيك

مش انت ولا فى حد غمى عينيك

وبعدين قول ياللى فى المرايا

فهمنى ايه الحكاية فرحان ... تعبان ... مرتاح

لما حاجات كتير ف حياتنا اتسببت فى حيرتنا

وادينا عايشين راضيين ... جايين ورايحين

من فيلم اسف على الازعاج

If you are good at something never do it for free

one of the best scenes ever
-------------

من شوية شفت جملة بتقول "If you are good at something never do it for free"
دورت على القائل لقيته شخصية الجوكر في فيلم باتمان

اول تعليق جه على دماغي (هي بقت كدة!)

تخيلت فعلا لو كل واحد مشي بالمبدأ دا ايه اللي هيحصل...

ان اي حد بيعرف يتكلم كويس هيبقى خطيب
اي حد بيعرف يقنع الناس يشتغل في المبيعات
طيب بيعرف يسمع كويس هيعمل ايه؟! ممكن يشتغل مستمع ياخد فلوس مقابل انه يسمع الناس!
واحد جيد جدا في القيادة يشتغل مدير
وقياسا على كدة معظم المهارات اللي ممكن تبقى جيد فيها
وأكيد كل واحد فينا عنده على الاقل مهارة جيد فيها

طيب كدة كل الناس اللي بتعرف تعمل حاجة هتاخد عليها فلوس ومستحيل زي المقولة ما بتقول انه يعملها مجانا

يعني انا لو محتاج دكتور ومش معايا فلوس اعمل ايه ؟!
لو بعمل اي حاجة ومحتاج مساعدة او نصيحة حد اشطر مني هعمل ايه؟!
هدفع مقابل النصيحة او المساعدة ؟! طيب ما هو دا اللي بيحصل فعلا دلوقتي في الconsultancy ؟!

كدة الناس اللي بتشتغل في العمل التطوعي من غير فلوس لمجرد انهم بيعرفوا يعملوا حاجة فبيعملوها
الناس دول دورهم كدة اتلغى.. طيب ممكن الدنيا تمشي من غير العمل التطوعي؟!

يعني ممكن الدنيا تمشي لو كلنا بناخد وندي ؟!
بس كدة مش هيبقى فيه حاجة اسمها بدون مقابل!
مش هيبقى فيه عطاء دلوقتي واستفادة في الاخرة!لأن الاستفادة هتبقى لحظية!

disperse

Dispersed mind

meaning of disperse:

To drive off or scatter in different directions
To strew or distribute widely: The airplane dispersed the leaflets over the city.
To cause to vanish or disappear. See synonyms at scatter.
To disseminate (knowledge, for example).
To separate (light) into spectral rays.
To distribute (particles) evenly throughout a medium.