احكي لمين

احساس ملازمني الفترة دي اني عايز اتكلم كتير اوي اوي،
صحيح انا بطبعي كتوم ومش بتكلم كتير بس يمكن دا لاني مش لاقي حد يسمعني او يفهمني.
بالرغم من ليا اصحاب كتير نسبيا بس بحس دايما ان فيه حلقة وصل مقطوعة بينا،

يعني دايما لما اتكلم معاهم بلاقي ردود من قبيل:
اتفلسف يا عم, ايه اللي انت بتقوله دا مش فاهم منك حاجة, انت بقيت خنيق كدة ليه ...
واللي يستحمل ويسمع شوية الاقيه يرد عليا بموضوع تاني خالص جمعه من الكام كلمه اللي فهمهم من كلامي كله
وهكذا الردود تتشابه...

ساعات بتخيل نفسي على الشزلونج عند طبيب نفسي وقاعد اتكلم كتييييير في كل حاجة
في زكريات الطفولة.. في احاسيس المراهقة..
في احلامي لبكرة احكيله الفيلم اللي شفته امبارح..
اكلمه بجنوني وحكمتي.. بقلبي وشهوتي.. بديني ودنيتي..

بفوق من وهمي عشان الاقي نفسي متخيل صديق بفلوس
معقولة يأست اني الاقي حد للدرجة دي
يعني مفيش غيرك يا نفسي
هفضل احكيلك يمكن في يوم تفهميني..